मुंबई: मुंबई महानगरपालिका निवडणुकीच्या तोंडावर शिवसेना (उद्धव बाळासाहेब ठाकरे) गटाला आज मोठा राजकीय धक्का बसला आहे. शिवसेनेचे (ठाकरे गट) माजी नगरसेवक अभिषेक घोसाळकर यांच्या पत्नी आणि माजी आमदार विनोद घोसाळकर यांच्या सूनबाई, तेजस्वी घोसाळकर यांनी अखेर पक्षाला रामराम ठोकला आहे. त्यांनी आज सकाळी भारतीय जनता पक्षात (भाजप) अधिकृत प्रवेश केला आहे.
तेजस्वी घोसाळकर यांनी समाज माध्यमांवर एक भावनिक पोस्ट लिहून पक्ष सोडण्याच्या निर्णयाची माहिती दिली होती. आपल्या पोस्टमध्ये त्यांनी म्हटले आहे की, “हा निर्णय माझ्यासाठी अत्यंत वेदनादायी आहे. मात्र, मुलांच्या भविष्याच्या सुरक्षेसाठी आणि माझ्या प्रामाणिकतेशी तडजोड न करता मला वेगळा निर्णय घ्यावा लागत आहे.”
पार्श्वभूमी:
- तेजस्वी घोसाळकर या दिवंगत अभिषेक घोसाळकर यांच्या पत्नी आणि माजी आमदार विनोद घोसाळकर यांच्या सून आहेत.
- अभिषेक घोसाळकर यांची फेब्रुवारी २०२४ मध्ये निर्घृण हत्या झाली होती.
- या घटनेनंतर काही महिन्यांपूर्वीच तेजस्वी घोसाळकर यांची भाजपच्या नेतृत्वाखालील मुंबई जिल्हा मध्यवर्ती सहकारी बँक (मुंबै बँक) च्या संचालकपदी नियुक्ती झाली होती. तेव्हापासूनच त्यांच्या भाजप प्रवेशाची चर्चा राजकीय वर्तुळात रंगली होती.
- विनोद घोसाळकर हे उद्धव ठाकरे यांचे निष्ठावान मानले जात असले तरी, अभिषेक घोसाळकर यांच्या हत्येनंतर आणि मुंबई बँकेच्या संचालकपदी झालेल्या नियुक्तीनंतर कुटुंबाच्या राजकीय भूमिकेकडे सर्वांचे लक्ष लागले होते.
तेजस्वी घोसाळकर यांच्या भाजप प्रवेशामुळे दहिसर-बोरिवली परिसरातील घोसाळकर कुटुंबाच्या पारंपरिक राजकीय प्रभावाला एक नवी दिशा मिळाली असून, आगामी पालिका निवडणुकीच्या दृष्टीने हा ठाकरे गटासाठी मोठा धक्का मानला जात आहे.
यावर आपले मत नोंदवा